aawaz

— हरी कृष्ण गौतम/ बेनी—

नेपाली जनताको महायज्ञ संविधानसभाको चुनावलाई धेरै उमेद्वारहरुले संसदीय चुनावको रुपमा सूचना प्रवाह गरेर आफ्नो भएको अलिकति इज्जतलाई पनि गुमाउन लागिपरेका छन् । जनताले युगको एक निर्वाचनका रुपमा लिएको यस संविधानसभा चुनावको प्रचारको क्रममा एक पार्टीले अर्को पार्टीलाई आलोचना गरेर आफ्नो गठबन्धनलाई नै कमजोर तुल्याउने प्रयासमा दलहरु लागेका छन् ।

      दलहरुका यस्ता प्रकारका कि्रयाकलापले संविधानसभा विथोल्न लागिपरेका तत्वहरुलाई थप हौसला बढाएको छ । भने जनतालाई निरास बनाएको छ । देशमा नयाँ संविधान लेख्नका लागि जनताले राम्रो कलमको प्रयोग गर्न चाहन्छन् तर प्रतिकि्रयावादी र राजावादीहरुले त्यसलाई भाँच्ने दुष्प्रयासमा लागेका छन् जुन् असह्य कुरा हो । अर्कातिर संविधानसभा चुनावका लागि प्रत्यक्ष प्रणालीमा उम्मेदवारी दिएका धेरैजसो अनुहार पुरानै देखिन्छन् जसले गर्दा फेरि पनि कस्तो संविधान लेखिने हो कतै पुरानै संविधानमा परिमार्जन हुने त होइन नेपाली जनता अन्यौलमा परेका छन् ।

          उम्मेदवारहरु सबै बूढापुराना नै देखिन्छन् । यसले युवाहरुलाई उपेक्षा गरिएको देखाउँछ । दलहरुले युवाहरुलाई कुनै स्थान नदिएर निराश बनाएका छन् । पुरानै सोचाइ र विचारले नयाँ नेपाल कसरी सम्भव छ जनआन्दोलनमा युवाहरुको सशक्त भूमिकालाई पातालमा पुर्याएर कस्तो संविधान लेख्न खोजिएको हो ? यो युवाहरुको प्रश्न बनिरहेको छ ।
नयाँ नेपालका लागि सबै कुराहरु नयाँ हुनुपर्छ भन्ने मान्यता सबैको हो । समाजका आर्थिक सामाजिक राजनैतिक साँस्कृतिक हरेक पक्षमा नयाँपन आउनुपर्छ परिवर्तन हुनुपर्छ । जसका लागि समाजका हरेक वर्गलाई समेट्न सक्नुपर्छ ।

         विभिन्न जातजाति समुदाय लिङ्ग सबैलाई समान प्रतिनिधित्व गराउने खालको संविधान अब लेखिनुपर्छ । यसका लागि संविधान लेख्ने मानिसहरु असल हुनुपर्छ राष्ट्रियताको भावनाले ओत्प्रोत भएको हुनुपर्छ । सबैलाई समान दृष्टिकोणबाट हेर्ने खालको हुनुपर्छ । नेपाली जनताहरुले अबको चुनावमा त्यस्ता खाले व्यक्तिहरुलाई मात्र चयन गर्नुपर्छ । जसले नेपाली जनताको आत्मालाई चिनेको होस् उनीहरुका इच्छा र आकांक्षाहरु बुझेको होस् । अनि मात्र नेपाली जनताले खोजेको संविधान निर्माण हुन सक्छ ।

       उमेद्वारहरुले पनि वास्तविक रुपमै जनताको मन जित्ने हो भने पहिले आ फू सच्चिनुपर्छ । एक उमेद्वारले अर्को उमेद्वारलाई एक पार्टीले अर्को पार्टीलाई आलोचना मात्रै गरेर नयाँ नेपाल बन्दैन । फुस्रो भाषण छाँटेर मात्र नयाँ संविधान लेखिँदैन । काम गरेर देखाउनका लागि चुनाव परीक्षा हो । उनीहरु परीक्षामा सफल हुने प्रयासमा लाग्नुपर्छ । आलोचना होइन जनताका वास्तविक समस्या र समाधानका कुराहरु राष्ट्रियताका कुराहरु गरेर मात्र सो परीक्षामा सफल हुन सम्भव छ । त्यसैले उमेद्वारहरुले असल उमेद्वार बन्नुपर्छ र जनताहरुले कसैको दवामा नपरी असल उमेद्वार रोज्नुपर्छ यो नै युगको माग हो ।