aawaz

 शिवरात्रीका लागि पशुपति मन्दिर परिसरमा बुधबारबाटै चहलपहल बढेको छ । पशुपति क्षेत्र विकास कोषले महाशिवरात्री पर्वमा १० हजार साधु, सन्त र नांगाबाबा आउने र १० लाख भक्तजनले दर्शन गर्ने अनुमान गरेको छ । पर्यटन मन्त्रालयले शिवरात्रीलाई व्यवस्थित गर्न पर्यटनमन्त्री पृथ्वीसुब्वा गुरुङको अध्यक्षतामा एक हजार एक सदस्यीय मूल समारोह समिति गठन गरेको छ । त्यसैगरी विभिन्न उपसमिति पनि गठन गरिएका छन् । पशुपतिनाथको दर्शन गर्न राजा ज्ञानेन्द्र भने बिहीबार साँझ ६ बजे जाने बताइएको छ ।

 सुरक्षा ब्यबस्थाको लागि ४ हजार भन्दा बढि सुरक्षाकर्मि परिचालन गरिएको छ भने दर्शनार्थीहरुलाइ मेटल डिक्टेटरबाट जाँच गरेर मात्र भित्र प्रवेशको  ब्यबस्था मिलाइएको छ । गतवर्ष राजा ज्ञानेन्द्र पशुपति दर्शन गर्न जाँदा ढुङ्गा हानेका कारण यस वर्ष राजा आउने समयमा वरिपरीका दर्शनार्थी तथा भक्तजनलाइ हटाइने भएको छ । पशुपति क्षेत्र विकास कोषले मन्दिर क्षेत्रमा क्यामरा मोवाइल टेपरेकर्डर लैजानमा रोक लगाएको छ । भक्तजनको सुरक्षा जनपथ र सशस्त्र प्रहरीले गर्ने भएका छन् । सुरक्षाकर्मीका साथै २ हजार भन्दा बढी स्वयमसेवक पनि परिचालन हुने भनिएको छ । सगरमाथा टेलिभिजनले प्रत्यक्ष प्रशारण गर्ने भएको छ ।